భార్య పక్కలో భగవద్గీతలెందుకు బాబూ! ఏవో నాల్గు కళాశాస్త్రపు మాటలాడరాదా?

- పానుగంటి, మాలతీమాల

కడుపులోకి వెళ్ళవలసిన నెయ్యి కాల్చేయటం నాకేఁవీ ఇష్టం లేదు.

- గురజాడ, కన్యాశుల్కం

సూర్యుడు సముద్రుడి దగ్గర అప్పు తీసుకుంటున్నాడు. ఆయన దగ్గరనుండి భూమి అప్పు తీసుకుంటోంది. దాన్ని సముద్రుడు వాడేస్కుంటున్నాడు. మళ్లీ పైవాడికి అప్పులిస్తున్నాడు.

- ముళ్ళపూడి, అప్పారావు కథ

అప్పంటూ ఇచ్చాక ఇహ కజ్జాలు రావటం ఎంత సేపు?

- ముళ్ళపూడి, గుర్నాథం కథ

పరపతికి నిదర్శనం అప్పు పుట్టడం కాదు

అణాపైసలతో అది తీర్చేయ్యగలగటం.

- సుబ్రహ్మణ్య శాస్త్రి, మార్గదర్శి

డబ్బుచ్చుకున్నాక చచ్చిన శవానికైనా కట్టక తప్పదు.

- గురజాడ, కన్యాశుల్కం

తీరిస్తే మటుకు మన అప్పులు తీరుతాయా బ్రదర్?

- రామదాసు, మాస్టర్జీ

ఆస్తి ఐపోయ్యాక అప్పు ఇచ్చేవాడే కరువైనందువల్ల అప్పు లేదు.

- ధనికొండ, ఎర్ర బుట్టలు

అప్పు లేనివాడే యధికసంపన్నుండు.

- వేమన

మాటలు వప్పజెప్పితే నటనౌతుంది

మనసులు వప్పజెప్పితే జీవితమౌతుంది.

- ఆత్రేయ, అశ్వఘోషుడు

ఇతర్లను అర్థం చేసుకోటం కంటే అపార్థం చేసుకోటం ఎక్కువ సులభం. అర్థం చేసుకోటానికి అనుశీలన అవసరం, ఆలోచన అవసరం, అంతర్ దృష్టి అవసరం. అపార్థం చేసుకోటానికి ఇవేమీ అవసరం లేదు.

- సంజీవదేవ్, రూపారూపాలు

ఆలోచనలు తక్కువైతే అపాయాఎక్కువౌతాయి.

- పినిశెట్టి, పల్లెపడుచు

ఆడదానికీ, మొగవాడికీ వుత్త స్నేహముండి, అన్ని వీళ్ళూ ఉండి, పడకలు లేకపోతే అది చాలా అసహజం. అందువల్ల అపాయకరం.

- చలం, ఆ రాత్రి

చెట్టుకి పేడవేశామని పుష్పాలకేమైనా అపవిత్రత వచ్చిందా?

- గురజాడ, కొండుభట్టీయము

పొడుమెక్కించే ముక్కు, పొగ పీల్చే నోరు శుభ్రంగా ఉండవు.

- సామెత

మొగుణ్ణి మోసగించిన ఆడదాన్ని ప్రియుడు ఒక్కనాటికీ నమ్మడేమో!

- ఆనందరామం, ఉరిమే మబ్బులు

మంత్రుల మాటలు అసలు నమ్మకూడదు.

- పతంజలి, అప్పన్న సర్దార్

మనిషి నించి మనిషికి సాధ్యమైనంత హెచ్చు ఉపకారము, సాధ్యమైనంత తక్కువ అపకారము జరిగేటట్టు చూసుకోవటమే సరి అయిన ప్రవర్తన.

- కొడవటిగంటి, చెడిపోయిన మనిషి

సత్యాన్ని అన్వేషించే కొద్దీ అసత్యం అనేది లేదని తెలుస్తుంది.

- చలం, మ్యూజింగ్స్

గాఢైన ప్రేమ వుందా, దాని పక్కనే ద్వేషం వుండనే వుంటుంది.

- చలం, మ్యూజింగ్స్

అత్తలేని కోడ లుత్తమురాలు, కోడలు లేనత్త గుణవంతురాలు.

- సామెత

మలినదేహుల మాల లనుచును

మలిన చిత్తుల కధిక కులముల

నెల వొసంగిన వర్ణధర్మ మధర్మధర్మంబే

- గురజాడ, లవణరాజుకల

చెమటోడ్చి ప్రపంచమునకు భోజనము పెట్టువానికి భుక్తిలేదు.

- జాషువా, గబ్బిలం

అన్యాయం ఎవడ్ని బాగుజేస్తాది? ఎండు దురదల మీద వేన్నీళ్ళు పోసుకొని గోక్కున్నట్టుగ ఆ గడియకే సుకంగా ఉంటాది. తరువాత మండిపోతాది.

- భూషణం, కొండగాలి

బ్రహ్మదేవుడు సోమయాజులుగారికి రంభను సృష్టించి సోమిదేవికి మాత్రం అన్యాయం చేస్తాడా ఏమిషి?

- కందుకూరి, హాస్యసంజీవని

రెండు న్యాయాలకు పరస్పర వైరం ఉండడం అన్యాయమే.

- కొడవటిగంటి, నిరాకరణ

'అన్యాయం పాపం నాశనం' అన్నారు. ఒక్క అన్యాయంతో పాపాలన్నీ పోతాయి.

- గురజాడ, కన్యాశుల్కం

గొంగట్లో అన్నం తింటూ వెంట్రుకలు ఏరినట్లు.

- సామెత

పేద కడుపు నింపను అన్నం వెదుకును, మహారాజు అన్నం నింపను కడుపు వెదుకును.

- సామెత

అలగావాండ్లకు అన్నం దొరికే మార్గం జూపందే సాంఘిక హక్కులిచ్చినా ప్రయోజనకారులు గారు. అవి నిలుపుకునే శక్తి గూడా వారికుండదు.

- ఉన్నవ, మాలపల్లి

అన్నం పరబ్రహ్మ స్వరూపం. అందుకు అన్వేషణ తప్పదు. పరబ్రహ్మాన్ని అన్వేషించడమే జీవిత లక్ష్యమని అన్ని మతాలూ అంగీకరిస్తాయి.

- చాసో, పరబ్రహ్మ

సారవంతమయిన గంజిని కాలువ పాలు చేసి, పిప్పిని "అన్నం" ఆనుకొని నాగరికులం తింటాం.

- చాసో, బొండుమల్లెలు

ఆడది మెచ్చిందే అందం. మగాడి కన్ను మసక.

- గురజాడ, కన్యాశుల్కం

కోపం వచ్చినప్పుడే ఆడది చాలా అందంగా ఉంటుంది.

- శివరామశాస్త్రి, చెంబు

సముద్రానికి మనుషుల వల్ల అందం తెచ్చుకోవాల్సిన ఖర్మ లేదు. మనుషులకే ఆ అవస్థ.

- వడ్డెర చండీదాస్, హిమజ్వాల

ఆడదానికి పేదరికం ఒక శాపం వంటిది అయితే పేదరికం లో అందం ప్రాణగండం వంటిది.

- లల్లాదేవి, రోహిణి

మేధస్సు ఒక సాలెగూడు, హృదయం ఒక అరకు లోయ.

- వడ్డెర చండీదాస్, హిమజ్వాల

అంతర్మథనం ఎప్పుడు ప్రారంభం అవుతుందో అప్పుడు అది ఎదుగుదల వైపు దారి తీస్తుంది. దానికి పెద్ద సంఘటననలు, కారణాలు అవసరం లేదు.

- వీరేంద్రనాథ్, ఆఖరిపోరాటం

అంతరాత్మలకు ఒక్కొక్కప్పుడు కించిత్తయినా ప్రపంచజ్ఞానం ఉండదు. అవి మనచేత ఎన్నో బుద్ధిమాలిన పనులు చేయిస్తాయి.

- ఆనందరామం, అద్దంలో శత్రువు

అంతరాత్మెప్పుడూ పనయిన తర్వాత ఏడ్చి తిడుతుందేకాని పనికి ముందు మాత్రం ఎప్పుడూ మనకడ్డురాదు. రాకూడదు.

- రావిశాస్త్రి, నిజం

నిర్మాతకు నీళ్ళు లేవు, ఎక్స్ట్రాకి నీటు తెమ్మన్నార్ట.

- శ్రీరమణ, న్యూనుడి

తల్లి చేలో మేస్తుంటే దూడ గట్టున మేస్తుందా?

- సామెత

గురువు నిలుచుండి తాగితే, శిష్యుడు పరిగెత్తుతూ తాగుతాడా?

- సామెత

అనుమానం అనేది మనుషులకు కలగకుండానే వుండాలిగానీ, అది కలిగిందా యిహ వాళ్లకు నిజవిషయాలు అనవసరం.

- నంది, నైమిశారణ్యం

చుట్టూరా శ్రీవైష్ణవులే, చూస్తే కల్లు కుండ లేదు.

- సామెత

ఎవరి అభిప్రాయమయినా వాళ్ళ అనుభవం నుంచే ఏర్పడుతుంది.

- వివినమూర్తి, ఉద్యమం